La Sale da Comunitât si cjate in Vie dal Monument, la strade che de place di San Marc a puarte viers Udin. Si cjate a cirche 200m dal centri dal paîs e a je la sede de Pro Loco Paîs di San Marc. Di resinte ristruturazion e ampliament, a ven doprade par cetantis ativitâts e iniziativis inmaneadis de Pro Loco e da la Associazion Ciclistiche Don Bosco.
La struture je fate di un fabricât principâl, indulà che par solit a vegnin metûts impins teatris e cunvignis, e e di un fabricât bas, lunc e stret, indulà che si cjate il barachin. Il grant plaçâl di fûr al pues contignî capanons e tendons par spetacui, o pûr fat par parchegjo.
Dentri dal fabricât principâl si cjate ancje un palc cun cuintis e tendon, adat propit pes rapresentazions teatrâls.

Ai 22 di Avrîl 2016, o vin screât “uficialmentri” la nestre gnove Sale da Comunitât. Presints centancj di lôr e cetantis autoritâts. Nus somee just publicâ il discors dal nestri sindic Massimo Moretuzzo:

Us domandi perdon se il salût al sarâ forsit un pôc mancul istituzionâl e un pôc plui di cûr…
Ma si sa, al cûr no si comande e vuê a salte fûr plui la me anime sanmarculine, cemût che la clamave Pre Fabio Simonut, che chê invezit di sindic.
Al è un onôr vuê jessi presint a cheste fieste, un moment dulà che une comunitât a torne cjase sô.
Doi agns di lavôrs che a son stâts pussibii in graciis dal jutori da la Aministrazion Regjonâl che cul so contribût al à permetût di fâ i lavôrs che a coventavin par comedâ e slargjâ la struture.
Cheste zornade e je ancje une ocasion par celebrâ dut il paîs di San Marc e la sô storie.
Storie che a scomence dal non dal nestri paîs: San Marc.
Non che nol à nuie a ce fâ cun la Republiche di Vignesie e al è impuartant dilu, soredut in chest periodi, ma che invezit nus pee in maniere fuarte a las origjinis da Patrie dal Friûl e a la sô Glesie, la Glesie mari di Aquilee che seont i studiis di Pre Guglielmo Biasutti prime e di Pre Gilberto Pressacco dopo, natîf di Turide di Sedean, je leade a la presince di San Marc in chestis tieris.
Se je vere che intal non je une part une vore impuartante da la identitât di une comunitât, nus plâs pensâ che inta la anime di San Marc a sedi restade une part di chê prime Glesie cristiane nassude in Friûl, peade in maniere fuarte a la glesie di Orient, cun braùre diferente da la glesie romane e uficiâl, buine di mantignî, intal scori dai secui, la sô diversitât, di glesie e di popul.
Nus plâs pensâ che i secui no vedin scancelât il savôr di chê diversitât, il gust di un sens di comunitât che a resist, seben di dut, che je buine di conservâ la sô semplicitât, il sô leam cun la tiere, che a podedi “de sua rusticitate gloriari”, come che a disevin i Patriarcjis di Aquilee par svantâsi no dome dal lôr leam fuart cun las comunitâts rurâls dal Friûl, ma ancje da la lôr origjinalitât.
In dì di vuê San Marc al pues jessi braurôs di cheste struture, cjase da la Comunitât, ma ancje dai soi bens civics, ven a stai chei 15 cjamps che i nestris vons nus àn lassât in ereditât e che vuê il Comitât presiedût di Paola al lavore cun la stesse atenzion che a veve la Vicinie di San Marc ce tancj agns indaûr.
Viodi in cheste fieste i pacs da farine fate cul forment biologjic che al cres intai cjamps dal paîs, al vûl di viodi un biel esempli di cemût che las comunitâts a podedin jessi segn no dome di coesion sociâl, ma ancje sogjet economic, bon di gjestî i soi bens tal interès da la int e dal ambient.
L’esperiment di San Marc al è stât il prin di une schirie di esperiments compagns che in di di vuê a son partîts in plui comunitâts dal Friûl, in prin che di Muçane, rapresentade vuê dal so sindic Cristian Sedran, che a lavore plui di 300 etars di proprietât coletive, fra boscs e cjamps e che e a inmaneât un progjet simil a chel di San Marc, e in colaborazion cun il so Comitât, su la filiere da la farine.
Cussì al è impuartant visâsi che il Comitât di San Marc al è un dai promotôrs dal progjet Pan e Farine dal Friûl di Mieç, inmaneât cun las Aministrazions di Merêt, di Basilian, di Sedean e di Flaiban, che al ten dongje 14 aziendis agriculis che an metût a disposizion di chest progjet plui di 40 etars di tiere par scomençâ une filiere dal pan tal Friûl di mieç.
Propit in chestis oris, intant che o stin tabaiant, chest progjet al ven presentât di bande dal conseîr comunâl di Merêt Walter Mattiussi e di bande di Valentina Guerra, une zovine ricercatrice da la Universitât di Udin, nuie che mancul a Barcelone, su invît da la Aministrazion da la citât catalane, che lu a volût presentâ come un bon model di lavôr fra Comuns, in ocasion dal Forum dai Comuns europeans che a stan resonant e discutint su las gnovis regulis di cumierç fra Europe e Stâts Unîts da la Americhe.
Duncje dutis resons par jessi braurôs e fâ fieste in cheste piçule comunitât.
Al è però impuartant visâsi che vuê no saressin chi se nol fos stât cualchidun che prin di no al à lavorât e cetant basilât par tignî adun la int e no lassâ che i gambiaments cussì fuarts dal mont di vuê a fasessin murî dut.
A saressin tancj oms e tantis feminis di ricuardâ, e la int di San Marc ju à intai vôi e intal cûr, ma o pensi che usgnot o vedin di nomenâ almancul dôs personis che nus an dât tant.
La prime je Fiammetta Monticoli, che nus à lassats trê agns fa e che je stade une colone di cetantis ativitâts dal paîs. Prin come mestre in chest asilo e po dopo come part dal grop teatrâl Las Befanis.
Simpri ative ogni volte che al jere di fâ alc insiemi. Simpri cuntune ridade e une batude ridicule par ducj, tant che cuant che à finît 90 agns la comunitât le a innomenade uficialmentri None dal Paîs di San Marc.
Non podin smenteâsi dal sô ultin regâl, il fat di vê lassât une part da la sô ereditât al paîs e a la so int. Ben e a fat alore la Pro Loco a volê intestâ la Sale dal Fogolâr a la memorie di Fiammetta.
Cussì come par Fiammetta, usgnot non podin no visâsi di Don Adriano Menazzi.
Don Adriano al è stât plevan di San Marc dal 1954 al 2011, cuant che il Signôr lu a clamât cun se. Al è stât par la nestre int un fradi, un pari e un avon.
Il Siôr Santul, come che o jerin usâts a clamâlu, nus a insegnât ce che al vûl di jessi comunitât, vê a cûr il ben dal paîs e da las nestris fameis. Cuant che si svicinave la fieste di San Marc al jere dut un eletric, pront a dâ ordins par netâ il paîs, par preparâ las rosis su la place e pai borcs, par jessi sigûr che il gustâ comunitari al fos inmaneât par la miôr. Usgnot o sin sigûrs che nus stâ cjalant plen di braùre e a lui o dedichin cheste fieste e il nestri salût.
Graciis di gnûf a ducj, compliments a la Pro Loco par la so sede e pal programe da la fieste e buine serade a ducj.