La Fieste dal Paîs di San Marc e je une manifestazion che si davuelç intal nestri paîs intal periodi Avrîl-Mai. Je nassude dal desideri di tornâ a meti impins intune forme gnove la Sagre de Place, une fieste paisane aromai bandonade di 25 agns. Tornâ a cjatâ un vecjo filmât indulà che si viodeve il coinvolziment di dute la popolazion dal paîs, tant che San Marc al deventave une vere famee, al è stât ce che nus à sburtât a tornâ a vierzi lis puartis, par podê tornâ a sintì il spirt de comunitât e la union che a varès di vê un paîs.
La Fieste dal Paîs di San Marc si davuelç inte rinovade aree da Sale de Comunitât.
Par fûr al ven metût impins un capanon indulà che a cjatin spazi lis taulis pe degustazion dai nestris plats e un palc dedicât ai intratigniments de serade. Inte part superiôr de aree a son a disposizion i barachins pe distribuzion dal bevi cun dentri l’enoteche, screade intal 2017, che à tirât sù un grant sucès. Simpri inte stesse zone a son presints il barachin de bire artigjanâl. Il spazi dentri de Sale, cui siei 100 puescj a sentâ, si trasforme par podê tignì lis cunvignis, lis mostris o lis seradis di teatri.
I nestris plats a saltin fûr des recipis de tradizion di San Marc, recuperadis e riviodudis, che a doprin prodots e speziis dal lûc. Si puedin cjatâ i prelibâts Macarons dal Leon, bogns macarons al ragù, o pûr lis Patates On the Roat, patatis fritis che a ricuardin il famôs flum che al coreve dongje il paîs, cuetis e aromatizzadis cun jerbis racueltis su l’ôr dal flum. No mancje la cjar ae griglie, cuete cun cjâf dal nestri staff, aromatizzâde cun speziis di San Marc. Lis pietancis à vegnin servidis cun patatis o polente. No son par ultims i dolçs: la Crep Fiammetta (dedicâde ae nestre benefatrice) cun riplen di creme di nolìs o pomutis di bosc, o pûr il Gilo Gelo, ecezionâl gjelato cun fraulis o cjocolate.
E par bevi? Nissun probleme. A son i famôs vins locâi, al tai o pûr in butilie, bibitis e aghe a volontât. Adiriture l’aghe in carafe, cjapade diretamentri da l’acuedot locâl, je sore nuje! L’enoteche à ufrìs vins rôs e blancs di qualitât, ducj cjolts intes plui famosis cantinis de regjon. A je ancje la bire, intun barachin in bande e la famose bire artigjanâl furlane Zahre Beer.
Screade intal 2017 come sfide, l’enoteche di subit à vût un gran sucès. A vegnin proponûts vins di cantinis locâls, cuntune sielte tra cirche 20 vins, blancs, ros e cun bufulis. L’esperience di Nando di Mortean nus à vuidât e nus vuide ogni an par miorâ simpri di plui. Ogni cjaliç al ven compagnât di un piçul crostin, simpri componût di prodots dal teritori. Une biele braùre pe nestre Fieste!
Di simpri la nestre Fieste a met une grande atenzion ae racuelte diferenziade des scovaçis, si dentri ducj i spazis de manifestazion, si “daûr des cuintis”. Aromai di cuant che o vin tornât a meti impins la sagre o vin decidût di doprâ massarie di ceramiche e possadis in açâl, in mût di meti in bande l’acuist di plastiche e cussì di tutelâ l’ambient. Chest nus è valût intal 2014 il 1° Premi di Sagre Virtuose, inte categorie Sagris Piçulis, inmaneât di Legambiente Friûl Vignesie Julie. Un motîf di braùre che nus à fat lâ indenant in altris sieltis che o crodin impuartantis. Intai agns indenant o vin decidût di doprâ pes tacis de birerie la Plastiche-Bio, plastiche speciâl che a ven butade intal umit. Intal 2019 o vin dal dut eliminât lis butiliis in plastiche, ufrint butiliis in veri di 1 litro, si pe aghe naturâl (ufierte sore nuie), si pe aghe cun bufulis (al cost di dome un euro). Nus è someât dovût ripuartâ cheste nestre sielte, fuarte, impuartant e condividude.
La Fieste dal Paîs di San Marc a je caraterizzade ancje de sielte dai intratigniments e dai grups musicâi che animin lis seradis.
Midiant le colaborazion artistiche cun Radio Onde Furlane, o vin podût ospitâ grups e sunadôrs di riliêf, par chel a rivuarde le sene musicâl furlane: Doro Gjat, Luna e un Quarto, Laip Ness Less, Nosisà, Rebel Bricks, FLK. La musiche a cjape dentri blues, folk, rap e rock progressîf. La rispueste de int a je simpri stade positive, cussì di sburtânus a cjalâ simpri plui dut il panorame musicâl de nestre regjon.
Le sielte di chest tipo di musiche, no gjave nuie al bal lis e ae musiche di scolte. Aromai je sigurade la presince di Alvio & Elena, deventâts nestris amiis, ma o vin vût il plasè di ospitâ ancje Mediterranea Music Group, Gli Anni Ruggenti, Casablanca Duo, Carmine, ecc.
Dentri te Fieste, a cjatin apontament fis anche altris iniziativis.
Prin di dut le Corse Ciclistiche par Arlevis, inmaneâde de Asociazion Sportive Ciclistiche Don Bosco di San Marc, che a clame dongje cetantis arlevis di dut il Trivenit e ancje plui in là. La Corse a cjape dentri dute une domenie e à simpri cjatât une rispueste positive di bande de popolazion, une vore leade al ciclisim. Nus ven facil ricuardâ che la Corse à vût come testimonial, la pluripremiade campionesse dal ciclisim nazionâl Elena Cecchini, origjinarie propit di San Marc.
Oltri ae Corse, a ven inmaneâde ancje la Cjaminade Cjampestre Ator Pal Roat, che ogni an a permet a ducj i partecipants di butâsi dentri il vert de nestre zone, jenfri i cetant biei percors studiâts di pueste.
Altre iniziative che nus plâs ricuardâ a jè la Rassegne Corâl, metude impins dal Coro Cjastelîr di Tombe di Merêt. Par solit la rassegne a cjate spazi la domenie dopo misdì e a clame dongje cetancj di lôr, afezionâts al cjant corâl e a la biele musiche.
Par cui che al vûl, chi sot lis nestris locandinis.