Il Comitât Frazionâl par i bens civics
Di simpri la tiere, come l’aiar e l’aghe, à rapresentât e à rapresente un element fondamentâl, vitâl, un ben comun di tutelâ e difindi. L’impuartance da tiere dal pont di viste sociâl, politic, culturâl, educatîf, il sô stret leam cun lis comunitâts locâls, je stade al centri des riflessions saltadis fûr jenfri la Fieste dal Paîs di San Marc, in dôs ocasions particolars come lis elezions dal “Comitât pe Gjestion dai Bens Civics” dal 6 di Mai dal 2012 e la cunvigne “Dalla Terra alla Comunità” (inmaneade cun la colaborazion dal CeVI, dal Coordenament Regjonâl de Proprietât Coletive, il Dipartiment di Siences Agreries e Ambientals de Universitât di Udin, il Dipartiment di Siences Umanes di Udin, il GVC e il RES) tignude sabide ai 12 di Mai dal 2012, cunvigne in preparazion viers la Conference Internazionâl su la Descrescite di Vignesie, davuelte dal 19 al 23 Setembar 2012.
Moments che, partint de esperience de Comunitât di San Marc che cun la elezion a je tornade a vê in man il vieli dirit di proprietât coletive parsore 5 etars di tiere, à coventin par pensâ parsore un model di svilup agricul e no dome, diferent di chel di cumò, centrât su la ricerche di une economie sostignibil e solidâl, su di une gjestion inovative atente ai proces partecipatîfs indulà che a vegnin metudis adun lis comunitâts locâls, a impat ambientâl ridot, a un rapuart diret produtôr-consumadôr, dut par favorî il comprâ a chilometro zero.
Une strade lungje, no dome une sfide, ma ancje une ocasion par pensâ, partint da la torne da tiere mediant i Comitâts Frazionai che à son l’ent locâl di dirit public fat a pueste par gjestî lis proprietâts coletivis, come che à dîs la leç e come che à son ricognossudis de leç. Dut par nô e par la tutele dai nestris fruts.
Dopo vê semenât, viodût cressi e cjapât sù il forment dai nestris cjamps, la Comunitât di San Marc a je contente e braurôse di presentâ il sô progjet su la filiere da farine e dal pan. Il forment prodot su mieç dai 5 etars di proprietât coletive, coltât seont i principis de agriculture biologjiche e controlât in laboratoris a pueste, al è di otime cualitât e la farine saltade fûr dal mulin e je une vore indicade pe panificazion e pe produzion di pizzis e fuiacis. O sin unevore braurôs. Graciis a ducj chei che àn colaborât a chest progjet.
4 Otubar 2013 – Serade di presentazion da la farine
“Farine di San Marc” – Dute farine dal nestri sac!
Il 4 Otubar 2013, o vin metût impins une serade par presentâ la gnove “Farine di San Marc”, in colaborazion cun il Comun di Merêt di Tombe, il Comun di Tramonç Disot, il Coordenament Regjonâl de proprietâs coletivis dal Friûl Vignesie Julie, il Forum regjonâl da l’economie solidâl e dai bens comuns e naturalmentri l’Associazion Paîs di San Marc.
Vie pe serade al è stât pussibil gustâ un pôs di prodots fats cun la farine di San Marc, cun acompagnament musicâl dal vîf, e scoltâ la cjacarade dai promotors di chest progjet e ancje di altris che a stan colaborant.
Fra ducj chescj il Comun di Tramonç Disot, che mediant il progjet dal For sociâl, al sta doprant la farine di San Marc par produsi tal sô fôr il Pan di Jole, in ricuart da la partigjane Jole De Cillia (Paola), origjinarie di Savalons (frazion di Merêt di Tombe) e copade tal Dicembar dal 1944 a Palcoda (frazion di Tramonti di Sot). Fracant su chest link, o sarês mandâts a la pagjine web dal Fôr sociâl.
La serade je començade cun l’intervent di Paola Fabello, president dal Comitât Frazionâl par la gjestion dai bens civics di San Marc, che à mostrât dut il progjet, da l’iter di ri-acquisizion des proprietâs, fintremai a la semine e al racuelt de farine.
Daspò a àn cjacarât ducj i relatôrs, presints a cheste cunvigne: Andrea Cecchini Sindic dal Comune di Merêt di Tombe, Luca Nazzi president del Coordenament Regjonâl des proprietâts coletivis, Graziano Granzit espert di agricolture biologjiche e biodinamiche, Christian Zoratto paron dal Mulin Zoratto di Codroip, Giampaolo Bidoli e Fabio Varnerin sindic e assessôr dal Comun di Tramonç Disot.
Une vore preseade la fermade a miege cunvigne. A ducj a son stâts ufierts i prodots confezionâts cu la nestre farine: pan, grissins, fuiaces e biscots.
La serade je finide cun la proiezion dal video di presentazion da la farine (chest il link par discjamâlu). Ta sale je stade ancje esponude la gnove “Farine di San Marc”, in sacuts di 1 kg, a disposizion par jessi comprade.
Tant suces a à ancje vût la storie di Jole De Cillia, ricuardade vie indilunc pai intervents. O sin braurôs di publicâ la foto dal prin Pan di Jole fat cu la farine di San Marc, prodot par nô di Guido, il fornâr di Tramonti. No dome un toc di pan, ma un toc di cûr!
Cui che al voles discjamâ la presentazion de serade, al pues fracâ su chest link.
Buone farine a ducj e come simpri: Vive San Marc!
La fieste, inmaneade dal Comitât Frazionâl e de Associazion Paîs di San Marc, a scomence dongje misdì, cuant che i fruts dal paîs a semenin un piçul tocut di tiere coletive. Chei altris tocs di cjamp dai Bens civics, a vegnin semenâts cu la machine a forment biologjic, prin pas pe costituzion di une “Filiere curte da la farine”.
Chest progjet al permetarà a la Comunitât di San Marc di vê il propri pan, tirât fûr da la proprie tiere, tal imprin destinât a chei dal paîs e, daspò, par jessi metût in circolazion jenfri la economie solidâl, sostegnuts da la “Res Friuli-V. G.” e dal Coordenament regjonâl de Proprietât coletive.
Chei altris 3 etars di proprietât coletive, ta la primevere dal prossim an, a saran semenâts a jerbe mediche, par la conversion al bio studiade insieme cui esperts da la Facoltât di Agrarie de Universitât furlane e de Associazion regjonal dai produtôrs biologjics Aprobio. I lavôrs di preparazion cun l’aratro e la grape a vegnin fats di oms volontaris.
Ancje Gigeto il nestri leon al à cambiât il sô look par la ocasion! Brao Gigeto!
La zornade dal 20 Otubar 2012 a sarà propit une date di ricuardâ par la Comunitât di San Marc. Un sium che al scomence a deventâ vêr, compagnât da la emozion che ogni frut al vîf inte spiete.
E propit i fruts a son stâts i vêrs protagoniscj de prime Fieste da la semine, cun il lôr entusiasim, il lôr zûc, la lôr voie di divertiment. Guidâts da la esperience di cui che al à cualchi an di plui, a àn semenât cun la vecje tecniche dal “spai”, come che si faseve une volte. Intant su l’ôr dal cjamp al ven metût impins un piçul gazebo par ufrì a ducj di mangjâ, di bevi e tante alegrie,
Ce volêso, a chi si fâs cussì…